المنتجات الفرعية

تم النشر بواسطة Mahmoud Emad
تاريخ النشر 2017 August 10

يعنى ايه منتجات فرعيه؟
المنتجات الفرعيه دى المنتجات اللى تكون قيمتها نوعا ما قليله وبنستخرجها من نفس الماده الخام raw material اللى بنتج بيها المنتج الرئيسي main product.
تعالوا نفهم أكتر من خلال المثال الصغير ده.:
فى مجال صناعات الاخشاب فى أغلب الاحيان واثناء عملية تصنيع الاخشاب "اللى هى المنتج الرئيسي" بينتج عندى منتج اخر فرعيه وهو نشارة الخشب. وبسمى المنتج الاخر ده"المنتج الفرعى" .,وقيس على كدا صناعات البترول واللى بيطلع منها شوائب وليها قيمه بيعيه ,وكمان الصناعات الغذائيه وغيرها..
السؤال ألأهم: ايه هى المعالجه المحاسبيه accounting treatment للمنتج الفرعى؟
فى رأكتر من رأى فى معالجة المنتجات الفرعيه وهانشوف منهم رأيين مهمين:
الرأى الاول: بيقول ان المنتجات الفرعيه دى نوع من انواع الايراد الثانوى المستقل وان المفروض أعرضه فى قايمة الدخل على انه مصدر من مصادر الايراد وان كان عرضى. والرأى ده بيتوافق مع معايير المحاسبه
يعنى مع كل عملية بيع للمنتج الفرعى بتاعى بقول :
من ح العميل
الى ح ايرادات بيع المنتج الفرعى
وبعد كدا بعرض ايراد المنتج الفرعى ده فى قائمة الدخل بشكل مستقل.
الرأى الثانى:
بيقول انى لازم أعتبر الفلوس اللى بتجيلى من ايراد المنتج الفرعى ده بمثابة تخفيض لتكاليف المنتج الرئيسي .يعنى لو المنتج الرئيسيى تكلفته 10ج والمنتج الفرعى سعر بيعه 2ج .يبقا نقول اننا نخفض تكلفة المنتج الرئيسي ده بمقدرا سعر بيع المنتج الفرعى وبالتالى هانقول ان التكلفه هاتصبح 8ج بس بدل من 10 ج .
سؤال كمان ياباش محاسب
تفتكروا هاتفرق كتير فى انى اقدر اعترف بالايراد ده كايراد مستقل أو انى اعتبره تخفيض للتكلفه مع النتايج فى النهايه هاتبقى واحده ؟!
الاجابه : ايوه طبعا هاتفرق كتير ودا لان حسب اختيارى لاى طريقه هاشتغل بيها هايختلف معايا رقمين مهمين جدا فى قايمة الدخل وهما تكلفة المبيعات ومجمل الربح واللى على اساسهم باخد قرارات مهمه جدا وبقيس مدى جدوى التشغيل بتاعى وهل بكسب فعلا من منتجاتى ولا الايرادى العرضيه هى اللى بتفرق معى
خلونا نشوف المثال العملى ده ونعرف الفرق بشكل أدق :
نفترض انى مصنع بينتج ويبيع الاخشاب وكان سعر بيع الانتاج الفعلى بتاعى 150000ج وتكلفة تتصنيع الانتاج ده 50000ج وكمان عندى مصروفات اداريه وعموميه وتسويقيه بمبلغ 30000ج ونتج عن عملية التصنيع دى منتج فرعى ذي النشاره ايراده 10000ج يلانشوف النتايج هاتكون ماشيه اذاي؟
لو بتتبع الراى الاول هاطلع قايمة الدخل بالشكل ده:
150000 صافى المبيعات
يخصم
(50000) ت.المبيعات
____
100000 مجمل الربح
(30000) يخصم م اداريه وتسويقيه
70000 الربح من التشغيل
10000 يضاف ايراد المنتج الفرعى
____
80000 صافى الربح 
اما لوبتبع الرأى التانى هاطلع قايمة الدخل كدا:
150000 ايرااد البيع
40000 ت.المبيعات(50000 -10000)
11000 مجمل الربح
30000 يخصم مصروفات اداريه
____
80000 صافى الربح
المحاسب العبقرى
تقدر تقترحلنا معالجه محاسبيه للمنتجات الفرعيه؟

أضف تعليقاً