قائمة التدفقات النقدية من الانشطة التشغيلية بالطريقه المباشره

الطريقة المباشرة هى الطريقة التى يتم استخدامها فى العرض داخل الشركة  لمتخذي القرارعلشان تكون سهله  فى طريقة عرضها ويمكن قراءتها بطريقة سهلة

هى الفكره زى ما وضحنا اكتر من مره انه الفرق بين الطريقة المباشرة والطريقة  الغير مباشره في طريقة عرض بنود التدفقات النقدية للأنشطة التشغيلية فقط ولكن الأنشطة الاستثمارية والتمويلية تبقى كما هى

علشان نعمل قائمه التدفقات النقدية بالطريقة المباشرة لازم ناخد كل بند من بنود الأنشطة التشغيلية ونشوف حركة النقدية المرتبطة بكل بند سواء تحصيلات أو مدفوعات.

قائمة التدفقات النقدية من الأنشطة التشغيلية

المتحصلات من العملاء

القائمة اسمها التدفقات النقدية وبالتالي انا عايز اعرف الشركه حصلت كام من العملاء خلال الفترة المالية الى الشركه بتعمل فيها القائمة

احسب ازاى التحصيلات بتاعه الشركه؟

مبدئيا المبيعات النقدية مفيهاش اى مشكله

الشركة عارفه مبيعاتها النقدية كام

الفكره بقى فى الأجل 

طيب بتبدا اى فتره ماليه يكون عندك رصيد مديونية للعملاء من الفتره السابقه وعندنا مبيعات اجله خلال الفترة الحالية واحتمال واكيد تم تحصيل جزء من مديونية الفترة السابقة والفترة الحالية أيضا

معادلة التحصيلات من العملاء =

المبيعات خلال الفترة الحالية + رصيد المديونية أول الفترة – رصيد المديونية آخر الفترة

مثال : فرضا بدأت السنة مديونية العملاء مليون مبيعاتك خلال الفترة 7 مليون  وفى نهاية الفترة رصيد المديونية 4 مليون

يبقى معنى كده انه الى تم تحصيله خلال الفتره الحاليه

= 1+7-4  =  4 مليون

الموردين

الموردين: يبقى تدفق نقدى خارجى

لو احنا عايزين نعرف دفعنا كام للموردين خلال السنة

بجيب المشتريات بتاعه الشركه طبعا لو شركة صناعية يبقى مشتريات خامات تعبئه وتغليف وقطع غيار وخلافه؛ الفكرة اننا نتعامل مع موردين لأنواع من المخزون.

هنحسب ازاى المدفوعات النقدية للموردين

= المشتريات + رصيد الموردين اول الفترة –رصيد الموردين اخر الفترة

يعنى فكرة المعادله هنقول  مشتريات + الفلوس اللى الموردين عايزنها منى اول الفترة  - المبلغ الباقى للموردين اهر الفترة = الفلوس اللى ادفعت للموردين خلال الفترة 

الفكره عشان نبقى فاهمين الموضوع

انت خلال الفتره دى اشتريت مخزون ب 5 مليون مثلا والشركة بدأت الفتره الماليه وكان عليها مديونية للموردين ب 3 مليون وفى نهاية الفترة بقى رصيد المديونية إلى علي الشركه 4 مليون

يبقى علشان نحسب المدفوعات النقدية للموردين نطبق المعادله كما يلى :

= 5 مليون +3 مليون – 4 مليون = 4 مليون 

الفكره الاساسيه عشان تبقى مفهومة الشركه كان عليها مديونية فى بدايه الفتره ب3 مليون واشترت خلال الفترة  ب5 مليون

وفى نهاية الفترة الباقى عليها 4 مليون

يبقى كل المديونية الى عليها 8 مليون 

وتبقى عليها في نهاية الفترة  4 مليون

يبقى الى تم دفعه 4 مليون الفرق يعنى.

فى جزئية كمان فى موضوع  المدفوعات للموردين وهى لو هيكون من الصعوبه انك تكون عارف المشتريات كانت كام

فالطريقه الافضل لحساب المدفوعات للموردين، ده علشان احنا بنشتغل بطريقه جرد دورى او مستمر، فى الجرد المستمر مفيش حساب مشتريات فنجيب المشتريات ازاى بص معادله بسيطه

تكلفه البضاعه المباعه + مخزون اخر الفترة – مخزون اول الفترة  = المشتريات خلال الفترة 

تكلفه البضاعه المباعه  ±التغير في المخزون – التغير فى الموردين

التغير في المخزون  معناه رصيد مخزون آخر المدة – رصيد مخزون أول  المدة

التغير فى الموردين  معناه  رصيد الموردين آخر الفترة – رصيد الموردين أول الفترة

علشان نفهم معنى المعادله دى ومننساش

تكلفة البضاعة المباعة عبارة عن مخزون كان عندك وانت بعته والمخزون ده فيه جزء منه يخص الفترة الحالية وجزء يخص الفتره السابقه يعني في جزء اشتريته الفترة الحالية وجزء اشتريته الفتره السابقه وايضا عشان اعرف انا دفعت كام للموردين لازم اشوف بدأت الفترة برصيد كام للموردين وكان فى نهايه الفتره بكام وعلشان كده المعادلة مرتبطه مع بعض.

يبقى علشان اعرف المشتريات والمخزون الى اشتريته  خلال الفترة

تكلفة البضاعة المباعة ± التغير في المخزون (رصيد مخزون آخر الفترة – مخزون أول الفترة)

والناتج نطرح منه التغير فى الموردين (رصيد الموردين آخر الفترة - رصيد الموردين أول الفترة)

تبقى الفكره كلها علشان نكون فاهمين انى عايز اعرف المشتريات بتاعه الفترة كام وكان عليا كام  للموردين فى بدايه الفتره والرصيد الى عليا فى نهايه الفتره كام وكده بسهوله اكون عرفت المدفوعات للموردين كانت كام خلال الفترة الحالية

نوضح اكثر بمثال: بلغت تكلفة المبيعات عن عام 2018  5 مليون  وبلغ قيمة رصيد المخزون أول الفترة 2مليون ورصيد المخزون اخر الفتره 2.5 مليون  ورصيد الموردين اول الفتره 750.  الف ورصيد الموردين اخر الفتره مليون

المدفوعات  للموردين: =  تكلفه البضاعه المباعه + التغير في المخزون – التغير فى الموردين

التغير في المخزون =  2.5-2  = 5. مليون ،  مخزون اخر – مخزون اول = التغير

التغير فى الموردين =   1- 750.  = 250. مليون  ، موردين اخر – موردين اول = التغير 

نطبق المعادله:  المدفوعات للموردين = تكلفه البضاعه المباعه ± التغير في المخزون ± التغير فى الموردين

تبقى المدفوعات للموردين =  5 + 5.  - 250. = 5.250 مليون جنيه .

الارصده المدينه الاخرى

هى اصول متداولة وهى مبالغ لصالح الشركة تم دفعها لاطراف اخرى سواء داخل الشركة أو خارج الشركة وسيتم تسوية هذه المبالغ زى مثلا العهد الى الشركه بتديها للموظفين وزى مثلا غطاء خطابات الضمان وزى مثلا تامينات لدى الغير وزى السلف اللى بتديها للموظفين و مصروفات مدفوعه مقدماً ايجار مقدم ، من الاخر مدفوعاتك المقدمه.

وبرضه زى موردين دفعات مقدمة بمعنى انك  دفعت فلوس  للموردين ولسه لم يتم تسليم البضاعة  ففى الحالة دى تبقى دفعات مقدمة  للموردين ارصده مدينه اخرى ونفس الكلام فى حاله المصروفات المدفوعة مقدما الفكره كلها انه زى ما وضحنا انه الارصده المدينه الاخرى هى اى مبالغ  لصالح الشركة لدى أطراف أخرى بخلاف العملاء.

طيب فرضا الشركة بدأت خلال الفتره الماليه الحاليه وكان رصيد الارصده المدينه الاخرى اول الفتره 600 الف وفى نهايه الفتره اصبح الرصيد 300 الف.

يبقى معنى كده انه فيه تحصيلات نقدية من الارصده المدينه الاخرى بقيمة 300 الف  يعنى يعتبر تدفق  نقدى داخلى

ومعناه أنه الشركه قدرت تحصل المبالغ  التي كانت دفعتها الفترة السابقة

والعكس  لو بدأنا أول الفترة  وكان الرصيد  500 الف وفى نهاية الفترة كانت 650 الف  يبقى معنى انه  كده انه فيه تدفق نقدى خارجي بقيمة   150 الف

وطبعا الارصده المدينه الاخرى بتنزل برقم  إجمالي فى القائمة  وانت بتكون عامل تحليل لكل بند كحاجة تفصيلية  ليك

علشان تستخدمها  فى التحليل المالى قائمة التدفقات النقدية

وممكن تعمل  المتحصلات من الارصده المدينه فى بند

والمدفوعات من الارصده  المدينه فى بند آخر علشان المستفيدين من القوائم المالية تبقى الارقام واضحه بشكل تفصيلى  

المصروفات فى قائمة التدفقات النقدية

الشركه زى ماهى بتدفع للموردين قيمة المشتريات من المخزون بيكون عندها مصاريف تانيه والمصروفات دى اما عموميه واداريه واما تسويقية وأما تشغيلية وأما تمويليه ودى طبعا الحسابات الأساسية للمصروفات ويندرج تحتها كل نوع من أنواع المصروفات مثلا الرواتب.

فيه رواتب اداريه ورواتب تسويقية ورواتب تشغيله حسب جهة  الصرف هتكون فى الاداره ولا فى معارض البيع  ولا فى المصنع طيب عايز اعرف المصروفات الإدارية المدفوعة خلال الفترة كانت كام خلال الفترة ممكن حد يقولك هاتها من ميزان المراجعة.

هو المحاسبة مبنية على أساس الاستحقاق  يعني بتحمل كل شهر بنصيبه من الإيرادات والمصروفات سواء حصلت أو اندفعت أو ما دفعتش واحنا هنا شغالين فى قائمة التدفقات النقدية وبالتالي عايز اعرف المصاريف العمومية النقدية فقط المصروفات العموميه والاداريه + التغير المصروفات العموميه  المدفوعة مقدما – التغير المصروفات العموميه المستحقة.

التغير يعنى رصيد آخر الفترة – رصيد اول الفتره  ده بصفة عامة.

ليه احنا ضفنا المصروفات المقدمة 

علشان المقدم ده معناه انك دفعته فعلا بس انت حطيته على المقدم علشان تحمل كل شهر بنصيبه من المصروف الى انت دفعته وبالتالى لازم اضيفه على رصيد المصروفات العموميه والاداريه ليه طرحنا المصروفات المستحقة ببساطة  لأنها لم تدفع حتى الآن هى بس تم تحميلها على الشهر طبقا لمبدأ الاستحقاق

الكلام ده يطبق على المصروفات التسويقية وعلى المصروفات التشغيلية

نيجى بقى المصروفات التمويلية فى قائمة التدفقات النقدية

أولا المعيار الدولى والمعيار المصرى لم يحددوا على المصروفات التمويلية  تكون ضمن النشاط التشغيلي أو النشاط التمويلي ولكن اشترط المعيار انه يكون فيه ثبات فى مكان البند بتاع المصروفات التمويلية بمعنى هتحطه تشغيلي يبقى كل فتره  ماليه هيكون فى التشغيلي او لو تحطه فى التمويلى يبقى كل فتره هتحطه فى التمويلى وده علشان مبدأ القابلية للمقارنة.

والعرف المحاسبى جرى انها بتكون ضمن النشاط التشغيلي وخصوصا لو الشركه بتعمل رقم تدفقات نقدية تشغيلية عالية فلما تكون المصروفات التمويلية ضمن التشغيلى ده بيدى الشركه موقف قوة  أمام المساهمين وأمام البنوك انها عندها رقم نقدي عال من النشاط التشغيلي ومن خلالها هتدفع فوائد البنوك بسهوله هى دى الفكره.

المصروفات التمويلية هى الفوائد الخاصة بالقروض والتسهيلات وايضا السندات إن وجدت وفى الغالب مبيكونش فيه استحقاق المصروفات التمويلية بصفه عامه لوعايز تعرف اى مصروف المدفوع النقدى منه كام المصروف + التغير فى المصروف المدفوع مقدما - التغير فى المصروف المستحق.

الفوائد المحصلة والايرادات الاخرى

هو مبدئيا فوائد الودائع بتكون ضمن النشاط الاستثمارى فيه بعض الودائع الفوائد بتنزل كل 3 شهور بس انت محاسبيا وفى دفاترك بتعمل قيد استحقاق شهري نفس الكلام الايرادات الاخرى

بمعنى كان عندك اسكراب مخلفات وبيعته وحتى نهاية الفترة المالية لم يتم تحصيل النقدية بس تم اثباته فى الدفاتر ايراد مستحق عن الشهر وعن الفترة المالية بقيد مثلا من ح/ ايراد مستحق الى ح/ ايراد مخلفات

يبقى عايز اعرف الفوائد المحصلة او الايراد الاخرى المحصلة نقدا.

= فوائد الودائع او ايرادات اخرى - التغير في الإيراد المستحق

بكده  اقدر اعرف  النقدية المحصلة من الفوائد او الايرادات الاخرى

الايرادات الاخرى ممكن تكون ضمن النشاط التشغيلي

توزيعات الأرباح بقائمة التدفقات النقدية 

توزيعات الأرباح المدفوعة ينطبق عليها نفس الكلام بتاع المصروفات التمويلية ممكن تشتغلى او تمويلى لو عايز اعرف توزيعات الأرباح المدفوعة فعليا

مثال: فى بداية العام كان التزام  توزيعات الارباح المستحقه 5 مليون  وفي نهاية العام كان 7.5 مليون وكان صافي الربح خلال العام 10 مليون رصيد الأرباح المحتجزة أول الفترة 20 مليون وفى نهاية الفترة بلغ 18 مليون  عايزين نعرف  المدفوع من توزيعات الأرباح.

الإجابة : مبدئيا لازم نكون عارفين  انه توزيعات الارباح المعلن عنها  حاجه وتوزيعات الأرباح المدفوعة دي حاجه.

بمعنى ممكن الشركه تعلن انها تقرر توزيع أرباح مثلا 5 مليون وتكون مستحقة على الشركة لصالح المساهمين يعنى التزام وقرار الدفع ده حاجه تانيه بيكون لما تتوفر سيولة نقدية للشركة

فى المثال عندنا : توزيعات الأرباح المعلن عنها صافى الربح خلال الفترة + رصيد الأرباح المحتجزة أول الفترة – رصيد الأرباح المحتجزة آخر الفترة

الأرباح المحتجزة دى معناها أرباح تخص سنوات سابقة والشركه موزعتهاش على المساهمين او استخدمتها فى اى حاجه بمعنى علشان نكون فاهمين الشركة بتكون كسبانه مبلغ السنه دى بس طبيعى المبلغ ده جزء منه بتوزيعها على المساهمين وجزء بيروح احتياطى وجزء بيروح ارباح محتجزة.

فى المثال بتاعنا رصيد الأرباح المحتجزة فى نهايه الفتره جزء منه من رصيد أول الفترة  جزء منه  جاى من أرباح العام

واحنا عايزين نعرف التوزيعات المستحقة على الشركة أعلنت أنها التزام عليها

= أرباح محتجزة أول الفترة + ربح العام – ارباح محتجزة  آخر الفترة

=20+ 10-18  =  12 مليون

التوزيعات النقدية

=  توزيعات مستحقة اول الفتره + التوزيعات المعلن عنها – توزيعات مستحقة آخرالفترة

= 5+12-7.50 =  9.5  مليون

معنى كده ان الشركة وزعت 9.5 مليون خلال العام  توزيعات نقدية  للأرباح

فى طريقه تانيه : ممكن تفهما بشكل تانى الشركه لما بعد لما تقرر انها توزع أرباح على المساهمين ممكن يكون بعد نهاية السنة المالية

ويكون القيد  من ح/ أرباح العام  الى ح/ توزيعات الأرباح

او ممكن من الأرباح المحتجزة  الى  ح/ توزيعات الارباح

يعنى يتكون عارف الرقم الى الشركه قررت توزعه  ال هو 12  مليون

وانت كان عندك رصيد أول الفترة 5  

يبقى كده إجمالي رصيد دائنو التوزيعات 17 مليون 

فى نهايه الفتره لقينا الرصيد  7.5  يبقى معنى كده انه اتصرف 9.5 مليون

هى الفكره كلها اننا كنا عايزين نعرف  الشركة قررت انها توزع  أرباح للمساهمين كام

ومن السهولة انك تجيب التوزيعات النقدية المدفوعة

الضرائب بقائمة الدخل 

ضريبة الدخل المدفوعة هي ضمن الأنشطة  التشغيلية  بتتحسب كالاتى :

 ضريببه المستحقه اول الفترة  بالمركز المالى + الضريبه الجاريه من قائمه الدخل عن الفترة الحاليه – رصيد الضريبه المستحقه اخر الفترة  بالمركز المالى = الضريبه المسدده المدفوعه 

مصروف الضريبة خلال السنة ( الحالية والمؤجل)

+ ضريبة الدخل المستحقة أول الفترة

+ ضريبة الدخل المؤجلة  أول الفترة

- ضريبة الدخل المستحقة في نهاية السنة

=   النقدية المدفوعة كضريبة دخل