قائمة التدفقات النقدية من الأنشطة التشغيلية شرح عملى

تم النشر بواسطة mostafa sobhy
تاريخ النشر 2019 July 21

خلصنا فى الحلقه الثانيه ( التسويات على صافى الربح قبل الضريبة) وده طبعا واحنا شغالين بالطريقة الغير مباشرة  وطبعا زى ماقولنا فى الحلقتين السابقتين انه الفرق بين الطريقة المباشرة والطريقة الغير مباشرة فى طريقة عرض قائمة التدفقات النقدية التشغيلية إنما الرقم النهائى فى صافى التدفقات النقدية التشغيلية في الطريقتين بيكون واحد طيب هنشوف دلوقتى قائمة التدفقات النقدية من الأنشطة التشغيلية والشرح عملى على كل بند لو فهمته يبقى هتعرف تعمل اى قائمة تدفقات نقدية واخر حلقه فى السلسله  هتبقى قائمه عمليه للشركه .

 توضيح الأنشطة التشغيلية الخاصة بقائمة التدفقات النقدية 

هى ان الانشطة التشغيلية تختص بعناصر الأصول المتداولة والالتزامات المتداولة من قائمه المركز المالى ونحسب التغير كما يلى : التغير = اخر – اول 

آخر هو رصيد البند فى الفترة الحالية  وأول هو رصيد البند فى الفترة السابقه تعالى نشوف

فى هنا قاعده اساسيه الزياد فى الاصول المتداولة تطرح فى قائمة التدفقات النقددية والنقص يجمع طبعا، طب الالتزامات، الزيادة في الالتزامات تجمع والنقص يطرح 

بند المخزون فى قائمة التدفقات النقدية

زى ماقولنا قبل كده علشان نعمل قائمة التدفقات النقدية لازم يبقى عندنا قائمه الدخل بتاعه الفترة الحالية والميزانيه او المركز المالي عن الفترة الحالية والفترة السابقة المماثلة لها علشان نحسب التغير فى البنود بتاعه الانشطة التشغيلية وهى بنود رأس المال العامل.

بنشوف التغير في المخزون فى الفترة ولتكن عام 2017 والفتره بتاعه 2016

وكان رصيد المخزون فى عام         2017 مليون

 ورصيد  المخزون   فى عام 750      2016 الف

التغير في المخزون =  1000000 – 750000 = 250000

معنى كده ان فى زيادة فى رصيد المخزون ب 250 الف كده ان الزيادة فى أرصدة المخزون تعنى أن بضائع تم شرائها خلال الفترة ولسه عندى فى المخازن ولم تحمل على قائمة الدخل علشان هى اصل متبعتش وعلشان كده بنخصم الزياده ده من قائمة التدفقات النقدية لأنشطه التشغيل، يعني بنعتبرها تدفق نقدى خارجى يعنى التغير فى المخزون فى الحاله دى بيكون بالسالب يعني هنخصم 250 الف كتدفق نقدى خارجي  (250).

مثال على النقص في المخزون

رصيد المخزون فى الفترة الحالية 750الف

 والفترة الماضية مليون

 معنى كده ان فيه نقص فى المخزون بقيمة 250 الف، النقص فى المخزون معناه ان جزء من تكلفة المبيعات بتاعه الفترة الحالية  يمثل بضاعه تم شراءها من العام الماضى وبالتالى ما تعتبرش تدفق نقدى خارج علشان كده بضيف الفرق  اوالنقص الى قائمة التدفقات النقدية التشغيلية كتدفق نقدى داخلى من الأنشطة التشغيلية.

المهم تكون الفكره وصلت 

يعنى لو رصيد المخزون عندى زاد فى الفترة الحالية عن الفتره السابقه ده معناه انه فيه تدفق نقدى خارجى بالفرق بين الرصيدين (  ) 

ولو رصيد  المخزون عندى قل في الفترة الحالية مقارنة بالفترة السابقة ده معناه انه تدفق نقدى داخلى بالفرق بين الرصيدين.

لما يحصل انخفاض فى قيمة المخزون  (هنشرح قدام معانا مع موضوع المخزون) لما نيجى نحسب التغير في المخزون بنهمل قيمة الانخفاض فى المخزون (مخصص هبوط اسعار المخزون) لانه بيكون غير نقدى وبرضه لما نيجى نرد قيمة الانخفاض مابنا خدوش فى اعتبارنا هى الفكره كلها انك بتكون رصيد المخزون الى فى GL يعنى رصيد المخزون الفعلي من خلال برنامج محاسبة وادارة المخازن .

بند العملاء فى قائمة التدفقات النقدية 

قولنا انه فى الطريقه الغير مباشره  فى المخزون بنشوف التغير فى الارصده بين الفترتين الماليتين وليكن عام 2017 -2016 بمعنى انه رصيد إجمالي العملاء

 فى عام 2016 10مليون

 وفى  عام 8   2017 مليون

التغير = 8 مليون – 10 مليون = نقص 2 مليون

ده معناه انه حصل  نقص فى رصيد العملاء وده يعتبر تدفق نقدى داخلى يضاف ضمن بنود الأنشطة التشغيلية الى هو 2 مليون.

طيب ليه تدفق نقدى داخلى

لان ده معناه ان الشركة حصلت مبيعات الفترة الحالية + مبيعات الفترات السابقة يعنى حصلنا من العملاء الفترة السابقة 2 مليون تدفق داخل وعلشان كده النقص ده يضاف فى البنود التشغيلية هى الفكره علشان تكون مفهومة برضه انه الشركه قدرت تحصل مديونية العملاء الفترة الماضية وقالت رصيد المديونية عندها فعشان كده النقص ده فى رصيد مديونية العملاء.

يعتبر تدفق نقدى داخلى يضاف ضمن البنود التشغيلية ويضاف طبعا فى بند الأنشطة التشغيلية الى صافى الربح قبل الضريبة الى عملنا عليه التسويات الخاصة بالإيرادات والمصروفات الغير نقدية. 

الزيادة فى ارصده العملاء

لو عايزين نحسب التغير فى ارصده العملاء خلال عامين 2016 و عام 2017 بافتراض أن رصيد العملاء  فى عام 8 2016 مليون  وفى عام 10 2017  مليون.

ده معناه ان فيه زياده فى ارصده العملاء ب 2مليون الزياده دى هتتخصم فى قائمه التدفقات النقديه ضمن البنود التشغيلية باعتبارها تدفق نقدى خارجى يعنى هتتخصم من صافى الربح قبل الضريبة باعتباره تدفق نقدى خارجى

لانه ده معناه انه فيه جزء من دورة مبيعات الشركة خلال الفترة الحالية لم تحصل. 

وطبعا مبيعات الشركه دى زودت صافى الربح قبل الضريبة  وعلشان كده هنحصم الزيادة فى ارصده العملاء خلال الفترة باعتباره تدفق نقدى خارجىبصفه عامه حالة زيادة رصيد مديونية  العملاء فى الفترة الحالية عن الفترة السابقة المماثلة  يبقى تدفق نقدى خارجى يخصم ضمن بنود الأنشطة التشغيلية ولما رصيد العملاء يقل فى الفترة الحالية مقارنة بالفترة السابقة ده معناه انه فيه تدفق نقدى داخلى يضاف ضمن بنود الأنشطة التشغيلية.

تدفق نقدى داخلى يضاف ضمن بنود الأنشطة التشغيلية

نفس الفكره برضه الى قولناها فى المخزون هى الى فى العملاء وهى انك بتشتغل على رصيد العملاء الفعلى الى موجود فى الحسابات وبالنسبه للانخفاض فى العملاء بنستبعده شغلك كله على الرصيد الفعلي.

الارصده المدينه الاخرى زى المصروفات المدفوعة مقدما  موردين دفعات مقدمة- تامينات لدى الغير غطاء خطابات الضمان - ضرائب خصم من المنبع واى ارصده مدينه اخرى لصالح الشركه بمعنى مستحقات للشركة لدى أطراف أخرى غير مديونياتها لدى عملائها لما نيجى نحسب التغير فى الارصده المدينه بنشوف مثلا:- 

يعنى لو رصيد الارصده المدينه 

مليون عن عام 2017

و  500 الف عن عام 2016

التغير = مليون – 500 الف = زياده 500 الف

معنى كده ان فى زياده فى الارصده المدينه خلال العام ده وهو 500 الف يعنى الشركة دفعت فلوس زياده العام ده مقارنة بالعام الماضى وده معناه انه فيه تدفق نقدى خارجى يخصم فى قائمه التدفقات النقديه ضمن الأنشطة التشغيليه والعكس طبعا فى حالة انخفاض الارصده المدينه خلال الفترة الحالية مقارنة بالفترة السا بقه.

يعنى لو رصيد الارصده المدينه خلال عام 2018 500  ألف وعام 2017 750 الف ده معناه  تدفق نقدى داخلى  لانه معناه انه الشركه قدرت تحصل جزء من الارصده المدينه الى ليها عن الفتره السابقه.

الالتزامات المتداولة التغير بالزيادة يجمع التغير بالنقص يطرح 

بند الموردين فى قائمة التدفقات النقدية

اى زياده فى ارصده الموردين فى الفترة الحالية مقارنة بالفترة السابقة معناه ان الشركة اشترت مخزون او مشتريات ولم يتم دفعها وبالتالى ده معناه تدفق نقدى داخلى يضاف ضمن بنود الأنشطة التشغيلية.

ليه برضه يعتبر تدفق نقدى داخلى علشان تبقى مفهومه

هى الفكره برضه بتكون انك اشتريت مخزون بالاجل ومن العام الماضى ودخل عندك وعملت مبيعات لسه مدفعتش للمورد فده يعتبر تدفق نقدى داخلى بمعنى لو كان رصيد الموردين

 فى عام 2017 مليون

 وعام 850 2016الف 

التغير =  مليون – 850 الف = زياده 150 الف 

معناه كده ان فى زياده فى المشتريات لم يتم دفعها وبالتالى يعتبر ده تدفق نقدى داخلى يضاف ضمن بنود الأنشطة التشغيلية والعكس طبعا فى حالة انخفاض أرصدة الموردين فى الفترة الحالية مقارنة بالفترة السابقة

طيب  لو كان رصيد الموردين فى  عام 2018   700 الف 

وعام  2017   900 الف

وده يعتبر تدفق نقدى خارجى يخصم من قائمة التدفقات النقدية ضمن البنود التشغيلية والموردين عكس العملاء .

الأرصدة الدائنة الأخرى

الأرصدة الدائنة الأخرى وهى الالتزامات التى تكون على الشركه وغير خاصة بالموردين زى عملاء دفعات مقدمة بمعنى المبالغ المحصلة مقدمة من العملاء والمصاريف المستحقة على الشركه زى الرواتب والأجور المستحقة على الشركة والتى لم يتم سدادها حتى تاريخ اقفال الميزانية وإعداد القوائم المالية وايضا المبالغ المستحقة على الشركة لمصلحة الضرائب بأنواعها زى القيمة المضافة وكسب العمل الخصم والتحصيل وهيئة التأمينات الاجتماعية وتأمينات للغير واى ارصده دائنه للغير، ودائنون توزيعات الأرباح زيادة رصيد الارصدة الدائنة خلال الفترة الحالية مقارنة بالفترة السابقة.

ده معناه ان فى تدفق نقدى داخلى يضاف فى قائمه التدفقات النقدية التشغيلية بمعنى لو اجمالى الأرصدة الدائنة الاخرى خلال عام 2017 مليون جنيه وعام 800 2016 الف ده معناه انه فى تدفق نقدى داخلى لان الشركة لم تسدد التزامات كانت تخص الفترة السابقة والعكس فى حالة انخفاض الارصدة الدائنة الاخرى فده يعتبر تدفق نقدى خارجى.

يخصم فى قائمة التدفقات النقدية التشغيلية يعنى الأرصدة الدائنة الاخرى عكس الارصده المدينه الاخرى.

المخصصات والتدفقات النقدية التشغيلية

المستخدم من المخصص يعتبر تدفق نقدى خارجى يخصم فى قائمة التدفقات النقدية لمخصصات والمعالجه المحاسبيه لتكوينها قيد تكوين المخصص

لنفترض ان الشركه كونت مخصص لقضية ك نمازع عليها وليكن 2500000 القيد بيكون 

2500000 ح/ مصروف قضايا متناوع عليها

2500000 ح/ مخصص قضايا متنازع عليها

المصروف ده بيروح لقائمة الدخل

2500000 ح/ الارباح والخسائر 

2500000 ح/مصروف قضايا متناوع عليها

والمخصص يكون فى جانب الالتزامات المتداولة إذا كان المخصص هيتم تسويتها خلال عام الحالة الاولى استخدام المخصص فى حاله استخدام المخصص بالكامل يعنى القضيه اتحكم فيها وهتدفع 2500000
هنعمل قيد استحقاق للدائنين.

2500000ح/ مخصص قضايا متنازع عليه

2500000 ح/ الدائنون ( الشركة او الهيئة الى كسبت القضية

وعند السداد

2500000ح/ الدائنون

ح / البنك 2500000

لو استخدمت جزء من المخصص يعنى مثلا 1500000 وردت الباقى لانتهاء الغرض المخصص منه.

1500000 ح /مخصص قضايا متنازع عليها

1500000ح/ الدائنون

وعند السداد

1500000ح/ الدائنون

ح/ البنك 1500000

الخلاصة ان المستخدم من المخصصات بيكون تدفق نقدى خارج يخصم من الأنشطة التشغيلي والمكون خلال الفترة لا يعد معاملة نقدية يعنى برده لصافى الربح زى ما سبق ووضحنا قبل كده
ضرائب الدخل المدفوعة تعتبر ضمن الأنشطة التشغيلية و تخصم من قائمه التدفقات النقديه التشغيلية الضريبة المدفوعة بس ودى تيجى ازاى بص يا عم حسبه صغيرة 

رصيد ضرائب أول ( العام السابق يعنى ) + ضرائب الفترة الحالية ( المحسوبة على صا افضل برنامج حسابات‎فى ربح الفترة من قائمه الدخل ) – رصيد اخر ( اللى ظهرت معايا فى مركز الفتره الحاليه ) = الضرائب المسددة.

بصفة عامة / توزيعات الأرباح المدفوعة تعتبر نشاط تمويلى حسب معايير المحاسبة.

ولكن البعض

يفصل توزيعات الأرباح للمساهمين تبقى فى النشاط التمويلي ويخلى توزيعات الأرباح للعاملين ومجلس الإدارة – تعتبر ضمن النشاط التشغيلي والغالب ان توزيعات الأرباح بتكون ضمن النشاط التمويلي  بشرط الثبات فى وضعها ضمن نشاط واحد فى الفترات التالية.

المستحق أطراف ذو علاقة

ده حساب ضمن الالتزامات – ارصده دائنه اخرى بمعنى المبالغ المبالغ المستحقة لشركات شقيقه او شركة تابعه بمعنى المبالغ المبالغ المستحقة لشركات شقيقه او شركه تابعه للشركه او تكون الشركه نفسها تابعة لشركات أخرى.

المستحق أطراف ذو علاقة بتكون طبعا فى الالتزامات المتداولة يعنى المبالغ المستحقة على  شركتك لاطراف اخرى.

بمعنى لو كان رصيد المستحق عليك فى عام 2010 مبلغ 117297 وفى عام 2011 بلغ الرصيد المستحق عليك 578699.

معنى كده انه فى زيادة فى الرصيد المستحق عليك وده يعتبر تدفق نقدى داخلى يضاف فى قائمة التدفقات النقدية ضمن الأنشطة التشغيلية 461402 = 117297 -578699 = والعكس طبعا فى حالة انخفاض المستحق أطراف ذو علاقة يبقى تدفق نقدى خارجى .

وهما زى ماقولنا ضمن التدفقات النقدية فى الأنشطة التشغيلية

المستحق على الاطراف ذو علاقة

حساب أصول – ارصده مدينه اخرى يعنى فلوس لشركتك عند شركات تابعة لها او شركات شقيقة عكس طبعا المستحق أطراف ذو علاقة بمعنى لو كان رصيد المستحق على أطراف ذو علاقة  في عام 2010 مبلغ 117297 وفى عام 2011 بلغ الرصيد المستحق عليك 578699 معنى كده انه فى زيادة فى الرصيد المستحق ليك وده يعتبر تدفق نقدى خارجى  يخصم فى قائمة التدفقات النقدية ضمن الأنشطة التشغيلية.

461402 = 117297 -578699 = والعكس طبعا فى حالة انخفاض المستحق أطراف ذو علاقة.

يبقى تدفق نقدى داخلى يضاف ضمن التدفق النقدى من الأنشطة التشغيلية

البندين دول ممكن يكونوا ضمن الارصده المدينه الاخرى او الدائنه الاخرى  وممكن يكونوا منفصلين حسب الأهمية النسبية يعنى لو المبالغ كبيره بالنسبه لباقى مبالغ الارصده المدينه والدائنه هنشوفها فى معيار الأطراف ذو علاقة

المصروفات التمويلية المدفوعة

المصروفات التمويليه بتخص فوائد قرض السندات والفوائد التمويليه الخاص بالقروض والتسهيلات البنكية بالرغم من انها بتخص انشطه ضمن تمويليه خاصه القروض والسندات الا انه فى الغالب العام وخصوصا فى الشركات المساهمة يفضل وضعها ضمن الأنشطة التشغيلية وده علشان يبين قدره نشاط الشركة التشغيلي على سداد الفوائد التمويلية وأنه النشاط التشغيلي يولد نقدية عالية وده طبعا فى حاله وجود.

فائض فى الأنشطة التشغيلية ولكن يفترض انه يكون فيه ثبات فى وضعها اما فى التشغيلي او فى التمويلى.

ملحوظه هامه فى قائمة التدفقات النقدية 

الفوائد التمويلية بتكون موجوده مرتين فى التدفق النقدىمره فى التسويات الى بتم على صافى الربح قبل الضريبة وده بتكون علشان تشيل أثرها على صافى الربح  قبل كده شرحنها قبل كده والمره الثانيه مخصومة ضمن بنود الأنشطة التشغيلية والتمويلية دى كل بنود التدفقات النقدية التشغيلية.

فى الحلقه الرابعه ان شاء الله هيكون معانا  الأنشطة الاستثمارية والنشاط التمويلى  وده كله طبعا فى الطريقه الغير مباشره وزى ماقولنا الفرق بينهم فى طريقة عرض التدفقات النقدية من الأنشطة التشغيلية وده هنشوفه فى الحلقه اللى بعد الجاى ان شاء الله فهم البنود دى  والبنود الجايه هواهم حاجه وهو الى يخليك تعمل قائمه التدفقات النقديه بسهوله.

أضف تعليقاً