تعرف على كيفية تسوية العهد النثرية او عهدة مشتريات

تم النشر بواسطة اكفليكس
تاريخ النشر 2019 August 25

هنشوف معانا النهارده نوع من أنواع المحاسبة المالية وهى العهد ده بتكون فى اغلب او كل  الشركات وهى فى الدليل المحاسبى جزء من الارصده المدينه الاخرى  يعنى ضمن الاصول المتداوله

ولتكن كود الارصده المدينه الأخرى 15

والحساب الرئيسي  للعهد       1505

وبيكون فيه حسابات فرعية لكل عهده

عهده محمود  ابراهيم            150501

عهده  احمد  السيد                 150502

وهكذا ده حساب كل عهده على حده (الاستاذ المساعد) علشان نعرف نعمل عليها.

فكره العهد النثرية او عهده المشتريات

و فكرتها ببساطة ان الشركه مثلا بيكون عندها مندوبين مشتريات بيشتروا مثلا زى قطع غيار وحاجات بسيطه خاصة بالانتاج او مثلا عهده لمسؤول حركة السيارات او عهده لاى فرد داخل الشركة مسؤول عن إنهاء معاملات ومصالح للشركة في هيئات  حكومية لازم يكون معاه عهده  يصرف منها ويتم إحضار فواتير بقيمة ماتم صرفه ويتم تسويتها.

انواع العهد النثرية او عهده المشتريات 

عهدة مؤقتة -  بتكون مره واحده او عدة مرات حسب الحاجة ويتم تجديدها حسب الحاجه اليها ( عهده مسئول الشئون الإدارية  تخليص اوراق فى هيئات حكومية)

وعهده دائمة – يتم استعادتها و تجديدها تلقائيا بشكل متواصل

والعهده الدائمة هى بتكون فى الغالب (عهده صيانة – عهده مشتريات قطع غيار – عهده مسئول حركة الصيانة وخلافه)

مبدئيا  لازم نكون عارفين انه كل شخص هياخد عهده

 الاداره بتكون محددة مبلغ العهدة حسب رؤيتها وحسب طبيعة استخدام العهدة

يعنى ممكن تدى شخص عهده 5 آلاف – شخص آخر 10 آلاف وهكذا

دور المحاسب من العهد النثرية او عهدة المشتريات 

اول حاجه هنفترض ان محمود إبراهيم أخذ عهده بقيمة 5000  ومحمود ابراهيم ده مسئول حركة السيارات فى الشركه وخاصه لصيانة السيارات وقطع الغيار

هو زى ماقولنا معاه عهده 5000 الاف

وجايب فواتير ب4500 جنيه

اول حاجة نبدا نراجع الفواتير اللى موجودة فى العهد  تجميع ارقام فيها

والضريبه بتاعتها اذا كان مسجل في الضرائب تخصم قيمة ضريبة الخصم والتحصيل من الفاتورة

اذا كانت الفاتورة اكتر من 300 جنيه ( نسبة الخصم 1% توريدات & 3 خدمات & 5%مهن حره

الخصم بيكون على قيمة الفاتورة بعد الخصم إذا وجد وقبل ضريبة القيمة المضافة

 ونراجع شكل الفاتورة من حيث:

اسم البائع

رقم الفاتورة –

العنوان - التليفون

 رقم السجل التجارى

 رقم الملف الضريبي

 ورقم التسجيل فى ضريبة القيمة المضافة

وتوقيعات المورد  وخلافه

دى اول حاجه فى مراجعة الفواتير

الحاجه التانيه: تبدأ نراجع الدورة المستندية للشراء سواء كانت قطع غيار او خامات مساعدة او فواتير صيانة  الالات او قطع غيار وصيانة سيارات

مبدئيا لازم نكون عارفين انه الموضوع بيختلف من شركه تانيه حسب الصلاحيات الممنوحة للأشخاص

يعنى مثلا ممكن فى شركة تلاقى مسئول العهدة ميجبش عروض اسعار ودى بتكون بموافقة المدير العام

وفى شركه تانيه لازم يجيب اكتر من عرض سعر مثلا فى شركه لازم الفاتورة يكون موقع عليه اكتر من شخص وخصوصا لو مبلغها كبير نسبيا 

هى الفكره انه كل مكان  حسب سياسته و حسب طبيعته وحسب الأدوات والظروف المتاحة لك إدارة حسابات انا بتكلم على الواقع العملى

تمام / انت كده راجعت الفواتير مظبوط  والتوقيعات والاستلامات والأذون الاضافه

بتبدا تعمل تسوية  العهدة  وترجع تعمل استعاضه بقيمة الفواتير الى هو جابها  بعد طبعا لما يتم توقيعها

من المسؤولين في الإدارة المالية  حسب كل شركة 

مثال على العهد النثرية وعهدة المشتريات 

عندى واحد اسمه حاتم مندوب مشتريات ده خاص بالمشتريات الصغيرة بتاع قطع الغيار البسيطة إلى المصنع بيحتاجها ويجيب حاجات البوفيه ويحجب مستلزمات مكتبيه او اى حاجه خاصه بالشركه 

بيكون عندنا حساب اسمه عهد نثريه ونفتح حساب فرعى باسم صاحبنا حاتم 

اول مره حاتم يشتغل ويصرف عدة صرفنا ليه 5 الاف مثلا

يبقى القيد 

5000 ح/ عهد نثرية

حاتم

إلى

5000/ البنك 

صاحبنا حاتم جه وجاب معاه كشف تسوية بالعهد ه وجاب معاه فواتير شويه حاجات خاصة بقطع الغيار وشويه حاجات خاصه بالبوفيه وشويات دفاتر وبوكسات ورق للاداره

يبقى القيد بيكون

3000 ح/ مخزن قطع الغيار * ***************

500 ح/ مصاريف عموميه واداريه بوفيه

900 ح/ مصاريف ادارية مستلزمات مكتبيه

إلى 

4400 ح/ عهد نثرية

حاتم

يبقى هو معاه لسه باقى 600 

ونعمل تجديد للعهد تانى بقيمة 4400

والقيد بيكون 

4400 ح/  عهده  *************

                إلى

   4400  ح/  الخزينة – البنك

وطبعا احنا فاتحين له حساب وعارفين هو المفروض يكون معاه فلوس كام 

تصفية العهد اثناء مراجعة الميزانية 

يعنى الفكره كلها بتشوف توجيه الفلوس الى هو صرفها يمكن صرفها لحاجات اداريه او اشترى حاجات خاصه بقسم المبيعات او مستلزمات انتاج او دفع بها فاتورة كهرباء تبقى مثلا مصروف صناعى يعنى حسب الغرض منها 

وطبعا لو فيه شراء مستلزمات قطع الغيار تراجع وتشوف لو فيه عروض اسعار فى الغالب فى الواقع العملى مبيكونش فيه اوامر توريد لانها بتكون من اماكن صغيره

تراجع طلب الشراء مع الكمية المشتراة وتوقيعات الناس المعتمدة والمصاريف التانيه برضه حسب دوره الصرف والتعميد بالشراء وحسب مبادئ المحاسبة المالية

المفروضة في نهاية الفترة المالية للعام إن أمكن يتم تصفية العهد مع أصحابها ثم يتم تجديدها فى الفترات التالية وخصوصا فى ميزانية نهاية العام ان امكن

وطبعا وانت بتراجع العهده  تبقى تشوف  المبالغ المدفوعه فى الفواتير مطابقة لنفس قيم المبالغ التي كانت مدفوعة لفواتير مشابهه في عهد سابقه ولا فيه اختلاف  ولو فيه اختلاف ترجع مسئول العهدة وتستفسر منه عن السبب يعنى الفكره انه يكون فيه كنترول على الفواتير وعلى أرصدة العهد بتاعه كل مسئول العهدة.

أطلب عرض سعر اقوى برنامج محاسبة فى مصر والشرق الأوسط من أكفليكس

أضف تعليقاً